سؤال جميل و مالوش لازمة!

مرة كنت بلعب صراحة مع ناس كده أعرف معظمهم والباقى عادى...
راح جه واحد المفروض يسألنى...راح بصلى كدة...و قال" انا هسألك سؤال غير في حياتى كتير...و خلانى أفكر"...
فانا بابصله بحاول أمنع نفسى من مليون تعليق أتريق عليه فيهم عشان الراجل أول مرة يشوفنى ويمكن يحترمنى...المهم قال بعد لحظة سكوت فيها تأمل...
"تحب تبقى صح...ولا مبسوط؟؟؟"
والصراحة...السؤال كان فيه شوية عمق...بس كعادة عندى حبيت أستفسر..قلت له "يعنى اية؟"
قالى - وفى عنيه نظرة احتقار شوية من غبائى-"قاللى يعنى تعمل الصح...وللا اللى يبسطك؟؟؟"
فبعد ماهو فسر الماء بعد جهد بالماء...سكت انا شوية...
هو بيتكلم مع واحد فضل طول عمره مش بيعمل اى حاجة غير اللى بيبسطه...من غير مايفكر الصح ايه والغلط ايه...كفاية انه صح بالنسبالى وخلاص...هاتعب دماغى ليه فاذا كان صح وللا غلط وللا حلال ولا حرام...
والمشكلة انى عارف ردود معظم الناس اللى معاية و ده شئ اتعودت عليه فى القعدات اللى زى ديه...بتتحول كل بنت لستنا عيشة وكل ولد بيتحول لوالى من أولياء الله الصالحين...فكله هيتدعى الحكمة...و هايقول"انا هاعمل الصح طبعا...لأن الصح فى الاخر هايخلينى مبسوط"

بس السؤال...هل احنا قد الصح؟؟؟...

سهل الكلام...بس مشكلتى الوحيدة انى لما بفكر فى الصح بلاقينى تايه شوية...لأن عمتا الصح كلمة غريبة و فروضها كتير...
يعنى لو انا صح...هل هاسيب حبيبتى عشان احنا "مش صح"...
لو انا التزمت بالصح....هل هابطل سجاير عشان السجاير "مش صح"
لو لو لو...على مليون الف حاجة باعملها غلط كل يوم...هاعرف أبطلها عشان أبقى صح؟؟؟...
وهل الصح فعلا بالسخافة دية؟؟؟؟

و السؤال الاسخف...
طب انا طول عمرى ماعملتس حاجة واحدة من الصح اللى بيقولوا عليه دة...
هل أنا مبسوط فعلا؟؟؟
ولا أنا مش راضى عن حالى ومكتئب...وكل حاجة فى الحياة مش ماشية...و فيها خازوق قد كده؟
يا ترى عشان انا "مش صح"؟

فانا بكل اللى جواية بصيت للولد اللى كان بيسألنى وقلت وانا بولع سيجارة...

"سؤال جميل...بس مالوش لازمة...لأن انا طبعا هاختار انى أبقى صح..عشان الصح هايخلينى فى الاخر مبسوط!!!!"

بص للسيجارة اللى انا باشربها باستمتاع...وقال بنفس نظرة الاحتقار..

"وماله"..!